Ev berhem, di koleksîyona destnivîsên kurdî ya A. Jabayî da bi reqema Kurd 40, Kurd 41/a û Kurd 41/b-yê hatîye tomarkirin. Nisxeyên bi reqema Kurd 40, Kurd 41/a-yê bi kurmancî ne; nisxeya bi numreya Kurd 41/b-yê wergêrana wê ya fransî ye. Navê destnivîsa bi reqema Kurd 40ê, bi temamî bi zimanê erebî Kitabu Durru’l-Mecalis li Mela Mûsa Hekarî ye; bi zimanê kurdî Tercema Kitêba Durru’l-Mecalis e. Teşeyê wê pexşan e; cureyê metnên wê, hîkayetên gelêrî ye. Mielifê wê Mela Mûsayê Hekarî ye. Hejmara wereqeyên wê 48, bi cureyê xetên ruq‘eyî hatîye îstînsaxkirin. Destnivîs di nav bergeka çermreş da ye; kaxeza wê zer e. Ev nisxe, ji 2480 rêzan pêk tê. Ebada destnivîsê 35x22 cm ye. Tarîxa îstînsaxa wê hicrî 1274; zayînî 1857-1858 e. Ev destnivîs bi “Hîkayeya Şêx Bersîsayî” dest pê dike: “Heye nîne, têk da fanî ne, ê ku ebed Xudê te‘ala dimîne. Carek ji caran rehmet li bab û daya guhdaran…” dest pê dike; bi risteya “Xulase fai’lê muxtar her Xudê te‘ala ye û şola ‘ebdan bi emrê wî û îrada wî ye.” diqede. Hêmin Omer Xoşnaw (2019) li ser vê destnivîsê xebitîye û wî digel pêşgotinekê ji nû ve çap kirîye.