“Xeberdana Zimanê Kurmacî ye” berhemeka pir giring û dîrokî ye ku Mele Mahmûdê Bazîdî di 1865ê da, ji bo hînkirina kurdîya kurmancî nivîsîye. Ev berhema Bazîdî ku di koleksîyona Aleksandre Jabayî da cih digire, bi temamî di forma dîyalogan da ye û ji pirs û bersîvan pêk tê. Ev dîyalog herçend ji bo hînkirina zimanî bin jî, ji bo roja me ya îro jî tijî agahîyên giring û balkêş in. Li ser folklora kurdî, bûyerên sîyasî, jîyana rojane, taybetmendîyên zimanî û hwd gelek agahîyên hêja tê da hene. 

Ev destnivîs, di koleksîyona A. Jabayî da bi hejmara “KURD 50”yê cih digire. Di dosyaya “KURD 50”yê da ji bilî vê destnivîsê, wergêrana vê destnivîsê hem bi rûsî hem bi fransizî hene ku ji alîyê A. Jabayî  ve hatine kirin. Hem wergêrana bi rûsî hem jî bi fransizî bi qasî nîvê metna orjînal in. Hem naveroka berhemê hatîye nirxandin hem jî tîpguhêzîya wê hatîye kirin. Lê di vê xebata ku ji alîyê Mikail Bülbül - Mustafa Öztürk ve hatîye amadekirin, tenê li ser destnivîsa Bazîdî ya orjînal hatîye sekinandin. Di dawîya vê xebatê da, kopîya orjînala xebatê ya bi herfên erebî jî hatîye dayîn.