Gelîyê Berdereşê, gelîyekî kûr, dirêj û bertesik e. Di navbera gelî de aveke pir û boş diherike nava Gundê Dêrê. Çemê Berdereşê di nava gelî de wekî marekî dirêj bi mendî diherike bo nava Deşta Bradosta. Ev çem, ji du keriya, li gundê Dêrê û devê Gelîyê Berdereşê li nava hev dikevin û hevdigirin. Çeqek ji çiyayên bilind û pirbefir ji Gelîyê Dirya tê, çeqê din jî ji devera şemzînan tê. Çendîn çeq û recikên çavkaniyên biçûk jî li dukeriyê hev hembêz dikin û bi mendi ber bi Deşta Ecem ve diherikin. Payîz û biharan çemê gelî har û din dibe. Ava pir bi pêl û şepol, şuwelî û biqur gelî vedimale, digel xwe dibe. Qurmên daran, çeq û liqên darên berûyên binya çiya ku zivistanê aşûtê ew dane nava per û baskên xwe û digel xwe aniye nav gelî, Hemu payîz û biharan renî û lêmiştên barana adar û nîsanê, vemalîne nav gelî, çemê har buyî digel xwe bi zorê topizî û bêdil dibe nava deştê. Hêviya gelek xelkê deştê, ji ber devê çem komkirina wan dar, koç û qûrmên mezinên rex çem û nava xîz û beran e. Zivistanan riya xelkê deverê bo deştê, ji deştê bo serhedên Bakur, bi tenê di nav zikê Gelîyê Berdereşê da ye.