Alî Aydin Çîçek, serra 1984 de Gimgim de dewa Emera de ameyo dinya. Hetanî lîse Gimgim de wendo. Unîversîteyê Duzce de qeydê xo viraşta labelê seba ke wezîfeyê xo yê eskerîye nêardo ca heqê wendişî dest ra ameyo girewtene. Ser ra 2009 de ÎHD yê Îstanbulî de duştê mîlîtarîzm û mecburîya leşkerîye de redê xo yê wijdanî eşkera kerd. Alî Aydin Çîçek 2003 ra nat Îstanbul de ciwîyeno. Gama ke dezgeyê UNESCOyî derheqê rewşa vindîbîyayîşê lehçeya zazakî /kirmackî de rapor vila keno, o zî binê tesîrê nê raporî de maneno, Enstîtuya Kurdî ya Îstanbulî û Weşanxaneyê Vateyî de verî derse gêno, dima o bi xo dersa ziwanî dano. Hîkaya ey a bi sernameyê “Xêx”î 2009 de musabeqaya hîkaye û şîîran a des û hewtin a Huseyîn Çelebî de xelata dîyine gi rewte. Dima, musabeqaya fiqrayana ke keyepelê Zazakî.Netî organîze kerda de, fiqraya ey a bi sernameyê “Şima Teske re Nêdanê, Dewlete Dana” xelata juyîne/yewine girewte. Reyna, 2010 de, musabeqaya hîkayan a Abdullah Duranî de hîkaya ey “Mar” xelata mansîyonî gêna. Û musabeqaya hîkaye û şîîran a des û heştin a Huseyîn Çelebî de zî şîîra ey “Xatir” xelata juyîne/yewine girewte. Çîçek, reyî zî endamê jurî yê Xelata Edebîyatî ya Huseyîn Çelebî bî. Şîîr, nuşte û hîkayeyê ey Toplum ve Kuram Dergisi, kovara Vate, kovara Şew çila, Tîroj, Kovara W û rojnameya Newepelî û welat Verrojî de weşanîyayî. Eserê ey ke weşanîyayê: 1-Teberik (hîkaye), Weşanxaneyê Vateyî, Îstanbul, 2010 2-Sayê Marû (Estanikanê Xinis û Tekmanî), Weşanxaneyê Vateyî, Îstanbul, 2012