Kurdîzan seba daraxê destpêkî 2 kitaban ra ameyo meydan. Yew, Kitabê Ders o, o bîn zî Kitabê Xebat o. Kitabê Derse musnayîşê temayanê cîya-cîyayan û babetanê gramerî ser o vindeno, la Kitabê Xebate tena egzersîzanê nê tema û babetanê gramerî ser o vindeno. Kurdîzanî de seba birêxistin û asankerdişê musnayîşî, sîstemê unîte û dersan ameyo xebitnayene. Kitab 2 unîteyan ra û her unîte zî 14 dersan ra yeno meydan. Pêro pîya 28 dersî Kurdîzanî de est ê. Kurdîzan seba perwerdeyê dibistane, programê lîsansî, ê masterî, kursê taybet û xebatanê şexsîyan ameyo plankerdene.

Kurdîzanî de metodê ‘‘Rehetî ra ver bi zehmetîye’’, ‘‘Sadeyî ra ver bi alozîye’’ ameyê xebitnayene. Kurdîzan, sey kitabê musnayîşê ziwanî, bi hewayêko seyyewbinî, averberdişê her çar bingeyanê musnayîşê ziwanî xo rê keno amanc ke ê zî goşdarîkerdiş, qiseykerdiş, wendiş û nuştiş ê. Kitabî de metodê pevalîn (spiral approach) ameyo xebitnayene. Babetê verênî mîyanê babetanê neweyan de ameyî tekrarkerdene. Bi saya tekrarkerdene, babetê verênî bi tekrarî û vîrardişî hîna baş yenê fehmkerdene.

Heme dersî, bi metîn yan zî dîyalogêkî dest pêkenê, dima gramerê a babete ca gêno û badî zî egzersîzî yenê. Û sewbîna peynîya her kitabî de ferhengekêk ameyo hazirkerdene. Nê ferhengekî de maneyê tirkî û îngîlîzî ê çekuyan ameyo nuştene.