Folklor û Ziwan kovarêka bihakem û mîyanneteweyî ya ke binê serbanê Weqfa Mezopotamya de serre de di reyî (nîsane û teşrîna verêne) weşanîyena. Kovare de folklor û ziwanê kurdkî ser o xebatê akademîkî ca gênê.

Çarçewaya folklorê kurdkî de babetê sey teorîyê folklorî, edebîyatê şarî, adet û tore, vîr û bawerîyê şarî, zanistê şarî, ferhengê mintiqayan, termê folklorê kurdkî, xebatê wareyî û nînan reyde cigêrayîş û nuşteyê derbarê etnografyaya kurdkî de ûsn. yenê weşanayene. Çarçewaya xebatanê ziwanî de zî her tewir babetê fonolojî, morfolojî, sentaks, morfosentaks, ziwannasîya şarî (sosyo-lînguîstîk), ziwannasîya ziwananê îranîyan û babetê eleqedarê sey nînan ca gênê. Kovare de nuşteyê ke formê meqale, açarnayîş, dayîşşinasnayîşê sempoyûmî, kitab û tezan de yê, ê zî yenê weşanayene.

Na hûmara yewine de hewt meqaleyê zanistî yê ke folklor û ziwanê kurdkî ser o yê, estê. Ziwanê meqaleyan, bi temamî kurdkî ya û na hûmara yewine de meqaleyê bi kurdkîya kurmanckî-kirmanckî û sorankî estê. Tayê meqaleyê ke na hûmare de ca gênê, wina yê: “Analîz û Pêveronayîşê Varyanta Kurdkî ya Hîkayeya Odîpusî”,  “Kirmanckî/Zazakî de Cumleyê Alozî”, “Berê Roşnvîranê Hawarî de Girîngîya Xebatanê Folklorî”, “Rolê Peygirê Partîsîpî Viraştişê Raweya Xeber, Waştiş û Şertî de”. Hêmin Omar Ahmedî zî xebata xo de ke bi kurdkîya sorankî ya, destnuşteyanê Leyla û Mecnûnî ser o vinderto ke hetê Mela Mehmûdê Bazîdî ra serra 1857î de ameyê nuştene. Nînan reyde peynîya kovare de dayîşşinasnayîşê di kitabanê ke çap bîyê, esto.